జగన్ పత్రిక ప్రభుత్వ వ్యతిరేకo

దివంగత ముఖ్యమంత్రి వైఎస్.రాజశేఖర్ రెడ్డి తనయుడు, యువ పారిశ్రామికవేత్త, కడప పార్లమెంట్ సభ్యుడు వైఎస్.జగన్మోహన్ రెడ్డి స్థాపించిన సొంత పత్రిక కాంగ్రెస్ పార్టీ అధిష్టానానికి వ్యతిరేకంగా పని చేస్తోంది. వైఎస్ తనయుడైన తనను ముఖ్యమంత్రి అభ్యర్థిగా ఫోకస్ చేస్తూ వార్తా కథనాలను పుంఖాను పుంఖాలుగా రాస్తున్నట్టు ఆ పత్రికను చదువుతున్న అనేక మంది పాఠకులు చెపుతున్నారు.

తన తండ్రి ముఖ్యమంత్రి ఉన్న సమయంలో వైఎస్ జగన్ ఆ పత్రికను స్థాపించారు. ఈ పత్రిక మార్కెట్‌లోకి వచ్చిన అనతి కాలంలోనే సర్కులేషన్‌ను పెంచుకోవడమే కాకుండా, కోట్లాది మంది పాఠకుల మనస్సుల్లో స్థానం సంపాదించుకుంది. ముఖ్యంగా, తెలుగు పత్రికా రంగాన్ని శాశిస్తూ వచ్చిన "ఆ రెండు పత్రిక"ల యాజమాన్యం గుండెల్లో దడ పుట్టించేలా చేసింది.

ఆ తర్వాత జరిగిన సార్వత్రిక ఎన్నికల్లో రాష్ట్రంలో తిరిగి వైఎస్ ప్రభుత్వం ఏర్పాటుకు అవసరమైన ప్రచారాన్ని ఆ పత్రిక, టీవీ ఇచ్చాయి. ప్రభుత్వానికి అనుకూలంగా వార్తలు ప్రసారం చేసి ఓటర్ల మనస్సు మారకుండా చేయడంలో కీలక పాత్ర పోషించింది. ఈ నేపథ్యంలో వైఎస్ మరణానంతరం రాష్ట్రంలో చోటు చేసుకున్న పరిణామాలతో ఖంగుతిన్న జగన్.. తన సొంత పత్రిక ద్వారా కాంగ్రెస్ అధిష్టానంపై తిరుగుబాటు బావుటా ఎగురవేశారు. తనను ముఖ్యమంత్రి అభ్యర్థిగా ప్రచారం చేసుకుంటూనే.. మరోవైపు రోశయ్య ప్రభుత్వ పనితీరును ఎండగడుతోందని ఆ పత్రికా పాఠకులు అంటున్నారు.

మొత్తం మీద జగన్ పత్రిక ప్రభుత్వ వ్యతిరేక పత్రికగా మారిందనే చెప్పొచ్చు.